عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسة العماص فى عينيك
مافيش مية تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصلة
ادى المترو واقف وكهربته فاصلة
فى الميكروباص خناقه وحاصلة
بيس فرامله عايزالها وصلة
توك توك ده تايه ومحتاج لبوصلة
توصل لشغلك بدم اتحرق
فى زحمةوكتمةوحر وعرق
رئيسك سايبلك كومه ورق
ده غير دمغةضايعة وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجة و شاى اندلق
ومخك خلاص م الصداع اتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت
عشان انت مصرى وده للاسف
فلازم تآسى ، تعيش ، تتقرف
وكل الاساسى فى حياتك ترف
فتنسى الكرامة وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟
الاشتراك في:
تعليقات الرسالة (Atom)
هناك تعليقان (٢):
طيب هاعلق تاني وأمري لله علشان التعيق اتبخر تقريبا!!
كنت باقول كان نفسي أقول أقول انه بيبالغ وان الصورة مش قاتمة أوي كدة بس معنديش جرأة كفاية للكدب ززي المسئولين بتوعنا!
رائع الفاجومي ولاذع جدا كالعادة..
تحياتي
:)
الصورة مش قاتمة ؟
إزاي بس يا إيما ؟
الصورة منيلة أصلاً . ويكفي أن تشاهدي حلقة من البيت بيتك البرنامج الحكومي لتدركي الحقيقة .
الفاجومي ربما تأخر في وصف حال مصر . فهذا الكلام كان ينطبع عليها منذ عامٍ أو عامين .
الآن صارت هذه الصورة حالمة وحكومية أكثر من اللازم .
خالص تقديري :)
إرسال تعليق